Eklipse

Kinain ng bakunawa ang buwan

ayon sa mga sinaunang paniniwala.

Tulad kung pa’no nilalamon sa kasalukuyan

ng mga dragon ang mga dapang-dapa.

Sa mga relihiyoso, ito na raw ang paghuhukom

ang panahon ng paghataol ay nalalapit na raw.

Ngunit sa mga hikahos, nilalamangan, at nagugutom

matagal nang nagdurugo ang bawat buwan at araw.

Sa siyensiya, pambihirang penomena

na ang biglaang dilim ay naging kamangha-mangha.

Marahil ang karimlan ay nakabubulag nga,

dahil kahit sa liwanag ay matagal nang nangangapa.

Kailan kaya darating ang araw na tayo’y magiging buwan?

Na ang kapangyarihan ng araw ay ating matatakpan?

Sa eksistensiyang ito’y posible pa ba?

Na ang maliliit naman ang nasa harapan?